BONIBONANN
Bon di y n bon ann
da Pontives a Plan,
a chëi che la ti à sciacà dl dut
a chëi cun longia zifres tl CUD.
Bon di y bon ann
ncuei uniral inò maià sann
danter la pestaries giapedes de bonaman
l zampone y le lenticchie dl talian.
Chiche à sambën almanco ncuei da s’la rì:
l ie pu si di de gloria: ie l fondue!
Ne stajëve purempò a ve brujé l mus cun l uele revënt
scenó monce cun Photoshop, vosta foto de profil sarà n spavënt!
Mo zeche uei ve cunsië, per scumencé bën l ann
l petardo mpià, ne tenide massa giut tla man.
Cialëde nce de ne nia jì ora dla set mesures cun pier y vin
y canche stluptrëis l struplon dl spumante, ocio al… ujin!
Per l ann nuef tulëve dant zeche che sëis boni de mantenì,
scumencian da chëi che dij: “Duman levi dala 7, per vester l prim sun i
schi!”
Sun zeche de bel, per l ann nuef, iel for drët se ncunferté
l’ëiles aspieta l ann dal stlef, ai ëi ti bastel mpue plu… se tripé.
Y a duc chëi mo single, che aspieta de se n giapé su una,
trajëve sëura na brea da dessot cuecena, chël dëssa purté fertuna...
Silvester, per i maridei y per chiche chier l amor,
lecurdëve la regula d’or:
“Sce n se aspieta puech dala festa, pona garatela for!”
Bon ann perchël a vo duc dl “liber dala muses digitel”
ve mbince 365 dis plëns de otimism y dalonc dal spedel.
Fosse unì gën a cianté da uni un de vo de persona,
ma sëis de massa, perchël jirei mé a stuné dal nonn y dala nona.