REALITY TE GHERDËINA: THE BIG BATULA
Cie bel che l ie a ne savëi cie fé
nsci possen sté mpue plu giut pra l café.
La cin’ miëura cumpanies ala bel nvià,
y per chiche paia la buandes, uniral ala fin inò strità.
“Lascia, chësc iede ie!”, “no, nia inò tu”
“do dut chël che me es cuntà...ie tl é mpermetù!”
La bona batules scumëncia bel da jëunes si cariera
les sa chiche ie Paris Hilton, ma nia canche fova la Prima Viera,
Vester dal bunder y povester mo mpue ria,
destin apustà, canche n n’à nia na vita sia.
Canche ie pona passei i ani che fova tan biei
y les cherda su i dutores dai scarpiei,
canche la runfles se ntana ite tla pel
pona a rujené ju di autri, iel pa permò bel.
Te n colp se dà dutes ju dassënn cun la moral
y devënta la profetes dl daunì de chësta bela val.
Chël che ie suzedù, sales sambën for avisa,
ma deguni ne sà mei, ulache dla ciacula ie la ravisa!
Pu da nzaul, me damandi, muessa pu la ciacula unì...
Ma nsci iela, canche duc dij for biei valënc de sci.
Chël, do n mëns se à spartì, chëla samont a parturì,
chëla se à rot n uf a jì cun i schi.
Chël, la sor de si fëna massa suënz va a crì,
chël, a fonc da tuesse va uni di!
La bona batules sà for dut miec
y sce la te va stleta, pona te jirala mo piec.
Da si ustaria pea via la ciacia ala stria,
destin apustà, canche n n’à nia na vita sia.
Les sà che ti daunì sarà plu burt dl prejënt
y cie che te suzederà, sce te pisceres contra l vënt!
Audles, audles, coche les cuiona
les dij che la ciampanes ala fin di conc stona,
les se arpiza sun ti esistënza sciche n arani,
les cunësc ti numer dl bancomat y ti davani.
Canche l sona la sirene sales bel debota da te dì,
ulache i destudafuech messerà śën jì!
Y canche ves te cunfesciunel, spiza la vista,
sce ne ues nia che al bar, uniral rujenà de ti pista.
Y savëis’a che Novella 2000, dan jì n stampa dassëira,
damanda ala batules, sce la nutizia ie pa bën vëira!
Ala fin, de cie ulons’a se lamenté,
la guaja ie de nosc inn ladin, for tlo a nes lecurdé
che me zeche, bon zitadin, es tu da fé
“rejona, rejona y no tl desmincé...”