TRÉ JU DALA CHËUTES
Jì a rumé ora dal tatl n’enziclopedia de scontrini:
dal pan y lat nchin ala Lamborgini.
Tré ju dala Steier zement y aspirina,
l Nesquik y l'Ovomaltina
y coche vel’ un danter vo savrà, la vasilina.
Te posses tré ju la cërn, sce da carnescià te ai fregà la panicia,
y sce la spënd massa, monce la nevicia.
I bastons da Nordic Walking posses trè ju,
o i Gin Tonic, ma mé sce ti es inò rejetei su.
Sci, tré ju dala chëutes posses la conta dla sciessa,
sce te es l zertificat, che l di do ies stat a mëssa!
Tré ju dala chëutes posses l maië dl cian y la cëura te ciulé abusiva,
ma di panuces dl giat, danz mé l'I.V.A.
Dla berstot la massaries,
sota l’ombrula la dumbries,
dl telecumand la patries,
... l spray contra la furmies
y la casses dal pier per la lies.
L fisco stluj datrai n uedl, ah chël vel:
sce ciociul ie deventà ti purcel
o sce i Rusc, al ultimo, à desdì ti hotel...
... o sce la rëstla dut nfugheda, à smacà l restel.
Sambën vala de mëter a verda uni di,
acioche i finanzri ne vënia a nes crì
na parola ladina nueva, che ne cunesciova nianca Anda Malia
al didancuei tla realtà de duc: Equitalia.
Ajache sce i afaresc ie sbriscei lic via sciche l gel,
pona al stato paia mé bel!
Ah, desminciove: tré ju dala Steier,
posses nce i vedli gettoni dla Frau Meier.
Ma lecorda, tré ju ne posses nia for,
dantaldut sce te ies ruvà pra zeche de valor:
Sce te verzon es abinà n tesor
o sce te es venciù na bedaia d'or.
Iló vala de paië nchin che l tacuin ie vërt svaient
y ti conto sarà tarënt.
Tré ju dala Steier per tré inant inò n ann,
speran che l stato ne feje nia massa dann...
Y sce l taierà i cuntribuc ala provinzia autonoma y messeron fé "digiuno",
pona savrons chi rengrazie: bën l Vespa Bruno!
Ma śën uei finé via cun ch'sc liejer ju,
ajache l’ëures passedes a fé poetry slam,
ah, chëles ne posses danz nia tré ju!