SE PAIA PA LA CULTURA?
Se paia pa la cultura?
Na dumanda contro natura?
Iela pa bën zeche che dura?
Cie me porta pa la scola?
canche messeré cuncé n busc tla sola
O ndrezé, canche sarà storta, la snola?
Percie algebra, rujenedes, storia y economia?
canche ne cunësce nstës mo nia mi drëta via
y sé mé, coche Socrates, che ne sé nia.
Percie son pa tlo, pericie sciaudé l banch?
Daduman levi bele stanch
y me toma i uedli dan cudejel dut blanch.
Jì a scola, nia de bel
Miec jì sa mont, mbracé n restel
o ti cialé pro al nëine, coche l lëura de scarpel.
La jissa pu tan saurì
n muessa mé la tò ala lesiera y mpue s’la rì
na tel alternativa per fé passé l tëmp se crì.
MA
Jiré purempò daldò al’università
ue cunëscer na nueva zità
da tati y mami dut cant paià.
Deguna ciampanela che sona dala ot,
dala doi daduman mo apusté n bon got
viver te n tel cuatier dut scassà y rot.
Pona dé n ejam uni mort de n papa
me messëi se lecurdé de mandé a cësa la rata:
vita alesireda, te na coa de bata.
Se paia pa jì a studië?
sté mo n valgun ani stravardà a se nsemië
y pumpé l nozionism sut ite tl cë?
Sambën, lauré fossa bën ënghe n'alternativa da garat
avëi mpue deplù munëides tl sach
se cumpré n auto y manejé l bancomat.
Ne ue pu nia unì ora coche n varizion
y davia che n di sarala stleta cun la pension
ne ue nia me ndurmenzé via la vita da lazaron!
Ma a vo che scutëis su, se paia pa scrì na poejia?
drameda nscila ju, dut ala nia
raudlé su ana y sanch, sciche na cudria
Sce l se paia…vëniel for damandà,
canche ne sé mo nianca sce l se paia tré l fla.
Povester, me mpënsi, che ala fin resposta tlera ne iel deguna
Chësta ie la vita… la se paia, ajache n on mé una.